经过周中一轮激爆欧洲赛之外，周末又有大把联赛玩，今日重心场次係英超「老虎」侯城主场对车路士，两军近况均欠佳，初盘车仔只让一球好似几笋，但车仔今季作客成绩一般，而大户亦静静鸡入定少少侯城，肥叔认为捧番「老虎」下盘为妙。（Now 621及LeSports HK应用程式周六晚10时直播）
以波论波梗係车仔高啲喇，但呢支伦敦球队状态大跌Watt，连杯赛在内单计法定时间近4仗未赢过，若果计盘路更4场输晒，证明上季所遗留落嚟嘅问题，并非新帅干地一时叁刻就解决得到。不妨再仔细啲，车仔今季客场成绩特别曳，开咧后4仗仅得1胜，如果计盘路，近3仗亦输盘收场，睇嚟呢架「老爷车」有排执。当然，孭住车仔呢个牌头，造访实力较弱嘅球队，无可避免地仍要让波。
另一边厢，侯城状态同样唔掂，近5仗赢得1场咁大把，仲要係英联杯击败沉到爆嘅史笃城。不过睇番今仗初盘，车仔只係让一球，睇落好似几笋，肥叔反而觉得似係凼你落叠买上盘。而且肥叔亦收到风，大户静静鸡入定少少「老虎」下盘，明显信唔过车仔，不妨趁早入定下盘。同时间嘅英超韦斯咸主场对米杜士堡，话晒米堡升班后近4仗作客仅1败，状态曳爆嘅「锤仔帮」仲要小让平半兼低水，似乎预示佢哋可赢波反弹，上盘不容错过。
（Now 622及LeSports HK应用程式周六晚10时直播）
