今年嘅欧国杯小组第叁都出到线玩16强，其实小弟就唔多赞同，冇错场数的确多咗，但变数同阴谋论就更加多，不过，瑞士同波兰呢两队都算叫正路跑出，并唔係受惠于小组第叁，16强第一场赛事就由呢两队首演，从两军晋级过程睇到，一队风格多变，一队稳阵可靠，估计大家嚟到淘汰赛，势均力敌，都係以稳阵行先。
（now 651周六晚9时直播）
瑞士及波兰都以小组次名进身16强，而且两军与同组首名同分出线，同组嘅主办国法国同德国喺佢哋身上都拎唔到甜头，证明佢哋係靠实力，而唔係要靠对手失分嘅球队，我会用「猪头骨」去形容瑞士同波兰。
仲睇两队数据？唔睇喇，上网你有得睇，等我用足球员角度解读啦。瑞士今时今日嘅成绩唔係突然之间爆出嚟，係经过过去二十年青训改革而得来，唔係一味靠外流，呢个係值得引以为傲。睇番分组赛，3场波对唔同球队，分别打出3种完全唔同风格，对住法国战术执行好好，对罗马尼亚肯放开对攻，对阿尔巴尼亚有耐性组织攻势，除了有应变之外，亦能打出自己风格，后防参与度很高，令整队联繫做得好好，我非常欣赏。
至于波兰，之前我亦讚赏过佢哋嘅团队性高，但係小组3场比赛中，我只会用平稳两个字去形容，而波兰嘅后防线就相对较被动。对德国当日，有部分控球在脚嘅时间，佢哋会好快放长传，或者希望中场球员返回中后场去策动攻势，嚟到16强，相信稳阵点都係会比较好啲。现今足球，快速反击及个人突破真係太快，往往两个球员就可以令你3、4个后衞疲于奔命，所以当老虎对狮子，大家都有利爪，边个会赢，就要睇边个较主动先。
