今届欧国杯话题多多，其中一些锺意埋怨或谂法负面嘅球迷， 称踏入淘汰赛分成「地狱下线」及「天堂上线」，即係强弱悬殊，又弹分组赛坚闷唔好睇。
正所谓顺得哥情失嫂意，睇番今届决赛周增至24队，令分组赛除小组头两名之外，亦有4支最佳第3名可晋级16强，形成首两仗表现欠佳嘅球队仍未绝望，甚至最终只累积3分（例如葡萄牙）亦可出线，呢类球队正正掌握到赛制嘅奥妙，或可愈走愈远。
至于淘汰赛分为「地狱下线」及「天堂上线」，一众强队如德国、法国、英格兰、西班牙等质晒喺下线，但笔者想问两强提早相遇有何不可呢？足球赛事最引人入胜之处，就係充满各种未知嘅可能性，实力较次嘅球队係咪一定无缘争标？係咪由两支劲旅合演决赛戏码先係正路呢？当然唔係喇！话晒欧国杯係四年一度嘅盛事，主办单位为新赛制绞尽脑汁，无非係想令赛事更加刺激吸睛，与其埋怨，不如好好享受呢两条强、弱线带来嘅精彩赛事吧。
至于今晚3场16强，先讲东道主法国对爱尔兰，爱军上仗只靠赢笃定出线嘅意大利仅仅晋级，毫无过人之处，试问点会係渐入佳境嘅法国对手呢？中间嗰场德国对斯洛伐克，「日耳曼兵团」乃大赛球队，係时候见真章，今仗实食冇黐牙，不妨捧埋佢哋有5.6倍嘅冠军；尾场匈牙利对比利时乃困兽斗，随时和波要加时兼射埋12码添，信不信由你！
