今届欧国杯分组赛踢到次轮，已略见眉目，每当有眉目，就係笔者出声嘅时候。前晚B组英格兰反胜威尔斯2比1，后备入替建功嘅华Dee及史杜列治，梗係赢尽掌声，但单凭踢咗头两场，就批评冇士哥嘅另一英军前锋哈利卡尼一无是处，实在太冇远见，不妨睇多几场先下定论。笔者喺上半场时搭紧的士，当时司机大嘆英军踢得好曳喎，笔者仲话打和机会较高，点知英军反败为胜，再次证明球赛会出现好大可能性，亦係其引人入胜之处。另外，All times talent can off set mistakes（有时天才可以抵销错误），英格兰质素远胜整体平庸嘅威尔斯，加上华Dee等人嘅灵光一闪，令踢得较差下照赢波，呢场应冇阴谋论。
讲到阴谋论，就不得不提昨晨C组次轮德国对波兰，双方首轮均赢波，今仗又互交白卷，齐齐拎住4分晋级在望。有啲朋友向笔者诉苦，赛前都认为双方眉来眼去，虽唔会打假波，但亦觉得不会搏尽，却因情意结而押注落德国，亦自嘲坚Bone head（愚蠢）。查实有料领队绝不要求球队场场去尽，尤其喺大赛分组赛，最重要出线，能够悭得气力梗係悭喇，德国係经验丰富嘅大赛球队，依家示人以弱又冇输波，亦唔影响出线何乐而不为呢？留番喺淘汰赛先晒冷都未迟。
