凭住众志成城，李斯特城缔造童话首夺英超冠军，从教廿多载嘅主帅「老狐狸」云尼亚里亦一尝顶级联赛锦标滋味，喺当今乜嘢事情都会发生嘅世代，不可能的奇迹终于发生了，震撼全球球迷。笔者近日无论与茶楼伙记、的士司机、银行柜台服务员倾开此事，都认为总比经常由班霸垄断为好，今季已神奇夺冠，咁李斯特城下季又如何呢？

金句中嘅Catch 22，意思为进煺两难。众所周知，李斯特城今季能一鼓作气，同佢哋于其他杯赛早早出局，专注联赛大有关係，云尼亚里基本上只用咗16、17名球员，兼且冇乜伤兵下编写童话，但下季佢哋要面对众豪门一直面对嘅问题，就係要征战欧联，现有嘅兵源绝对唔够用，高层定必会为此打吓算盘，会否为掘呢个「金矿」增兵呢？至于参加欧联耗力唔小，对欧战经验不足嘅「狐狸」嚟讲，势必拖累联赛战绩，最重要係主力占美华迪、马列斯、尼高路简迪等踢到晓飞，随时掀起新一轮挖角潮，李斯特城变成「豪门超市」不足为奇，难怪云帅话下季目标係联赛前十，绝非扮谦虚。如果李斯特城下季能位列前八，相信连笔者副眼镜都会跌烂埋。