一场过嘅决赛劲多变数，就算强如巴塞隆拿嘅大热门，都不宜太早捧场，今日重心推介场次，係葡萄牙杯决赛波图对布拉加，查实两军半斤八両，布拉加一向都係猪头骨唔易啃，初盘仲有得受让半一咁笋，大户又静鸡鸡入定啲货，呢个下盘咪走鸡。
（周一凌晨零时15分开赛）
欧洲5大联赛上周曲终人散，埋单计数，肥叔今季託赖都执番唔少，成日都话只要用心去搵，一定会搵到笋盘。好似上周中欧霸决赛利物浦对西维尔，红军开波前杀声震天，初盘要让平半兼略低水，完全係名牌效应，你当4届冠军西维尔係流嘅咩，明显係一场下盘波。去到临开波前，西维尔果然係咁跌水，证明世间仍有好多识波之士，就算上半场红军领先一粒，仲有好多人狂追西维尔「走地」嘅平手盘，最后飞到波到，西维尔顺利反胜3比1捧杯，肥叔亦执到笑。
今晚葡萄牙杯决赛波图喺中立场恶斗布拉加，亦係一场明显嘅下盘波，名气上波图个朵係响啲，但初盘要让到半一咁辣，纯粹係名牌效应，最重要係睇埋水位，依家两队都係九二水，睇嚟波图係热唔透。而且布拉加不嬲係被人低估嘅葡超第4势力，近4次对波图只曾1败，今仗受让半一真係笋到晕，加上大户已趁机入定少少货，随时开波前转受让平半都未定，呢个下盘有买趁早。
