笔者最心仪嘅顶级赛事、今晚欧联决赛令人惊喜，相信季初冇人估到，2支参与今届欧联嘅马德里球队，竟排除万难杀入决赛，Deja vu（法文：似曾相识），因为3年内第2度合演同城打吡──皇家马德里对马德里体育会，堪称佳话。今日第1句金句中嘅A Tale of One City（同城记），灵感来自英国大文豪狄更斯嘅名着《A Tale of Two Cities》（双城记）演变，同城最强兼死敌硬撼一定搏甩髀，实好睇过戏，万勿错过。
讲到令人惊喜之事，又岂止欧联决赛同城记。李斯特城于英超缔造终极灰姑娘故事，除咗显示出佢哋众志成城、踢足球最纯粹嘅一面，亦证明于金钱挂帅嘅现代足球，并不一定由财雄势大嘅豪门所垄断。李斯特城主帅云尼亚里由最初放弃杯赛，定下40分嘅护级目标，逐步到前10、前6欧霸席位、前4欧联入场券到冠军，其金句係「最重要嘅比赛係下一场」。
呢种务实主义，笔者于5个10年前早已领悟，并于2011年带领充斥工兵嘅地区球队荃湾，就喺限米煮限饭下，以不败夺得香港丙组联赛冠军。今季车仔内乱、尹戈尔执唔掂曼联、阿仙奴于季中甩辘、曼城主帅比历连尼「被辞职」等，太多不寻常嘅事情，竟然一季内爆发，造就「狐狸」不可能夺冠终于发生，英超为大家所带来嘅震撼，非其余欧洲4大联赛（法、德、意、西）所能比拟。
