今个月嘅足球戏码牌面上好劲，分别有美洲国家杯同欧洲国家杯，都係喺6月至7月打晒，塬因係8月要举行巴西里约热内卢奥运，所以今年暑假嘅足球节目係好丰盛。
由于今届欧国杯增加到24队，赛程自然长咗，既然多咗8支球队，Peter相信喺呢个情形下，会有好多「不明物体」出现；再加上唔少名牌国家嘅球员，喺刚过去球季都踢到筋疲力尽，呢啲顶级联赛球星要喺欧国杯踢出水准，绝对唔係易事。
唔少球迷都睇好热门球队好似德国、法国会攞到欧国杯冠军，但Peter反而觉得好多新兴势力可以争标。至于英格兰方面，呢队波身处「死亡之组」，Peter认为佢哋入到4强已经係上上佳作，因为就算要过兄弟兵威尔斯都唔係咁易骾。虽然香港唔少球迷都心仪英格兰，但Peter就绝对唔睇好。
至于世界杯冠军德国，球队后防始终唔太稳阵，加上除影子前锋汤马士梅拿外，再冇其他柱趸前锋畀球队作出应变，牌面上虽然係众望所归嘅大热，但要攞到冠军，Peter就认为唔太值博。至于边队最有冠军相，Peter就会喺分组赛开打后再同大家研究，以免喺呢段时间误导球迷。
美洲国家杯方面，巴西现时已今非昔比，阿根廷虽有美斯在阵，佢亦好想替国家赢得大赛冠军，但始终踢咗咁多届都唔成事，自然有心理压力。其他出战美洲国家杯嘅球队都係猪头骨，所以Peter相信决赛未必会係大家所想嘅戏码巴西对阿根廷，信不信由你嘞！
金句：初夏两大国家锦标赛、我心仪冷门多过热门
