軍情

伊朗大軍以去年世盃主力為骨幹，雷丁中場艾沙杜拿希因傷落選。

也門大部分球員均於亞洲聯賽搵食，其中有3位球員未有班落，質素參差。

伊朗
停賽：／
上陣成疑：／
受傷/缺陣：／

也門
停賽：／
上陣成疑：／
受傷/缺陣：／

球賽預測
伊朗可輕鬆大捷

D組大戰，伊朗強勢迎擊也門。伊朗曾13次殺入亞洲盃決賽周，當中有3次封王、4次季軍、闖入8強則有4次，以伊朗的戰鬥力及極為豐富的大賽經驗，於亞洲盃分組賽出線的機會，絕對是高唱入雲。
事實上，伊朗領隊奎羅斯準備功夫亦相當充足，這位葡籍主帥，無論用兵戰術、臨場指揮的功力，均比以往執教皇家馬德里時更出色。2018年世盃，伊朗是表現最好的亞洲球隊，以1:0擊敗摩洛哥、與西班牙鬥得難分難解、最後一輪則以1:1賽和有基斯坦奴朗拿度壓陣的葡萄牙，有睇波的朋友，都見到伊朗無論身體質素、技術甚至速度，即使面對歐洲球隊亦不落下風。

也門質素經驗輸一大截

至於也門則首次出戰亞洲盃，經驗已經輸一大截，世界排名亦是24隊中最低的一隊，一眾國腳多只於也門聯賽或亞洲二線聯賽打滾，要數也門陣中最為港人熟悉的人，肯定是曾執教南華的主帥高世安。今次也門旨在汲取經驗、無欲無求，今場對伊朗難逃一敗，筆者認為伊朗可輕鬆取勝。

對賽

兩軍於2012年曾經交手，伊朗以2:1勝出。