禾堡史浩克開慣大騷

德甲獨腳戲禾夫斯堡主場對史浩克04，禾夫斯堡王牌球星奇雲迪布尼轉會曼城事件一波三折，到尋晚截稿前仍然未有定案，雖然連德國權威網站《踢球者》都話轉會費已經傾掂數，但入夜禾堡體育總監K阿羅夫斯又企出嚟否認，今晚佢踢唔踢得對勝負關係重大，大家不妨等埋出賽陣容至落注，不過無論佢踢唔踢得，禾堡主場攻力始終有保證，面對攻強守弱嘅史浩克，入球大都係穩陣嘅投注首選。

（now 670、有線61及201台周六凌晨2時30分直播）

奇雲迪布尼無疑係禾夫斯堡陣中首席球星，既係上屆德國足球先生，亦係上季德甲助攻王，全季未缺席過一場比賽，「狼堡」今場要讓半一，有冇佢喺度影響好大，雖然今仗另一名德國國腳舒賀爾尼傷愈復出代替佢，但若然迪布尼缺陣中場組織能力肯定大打折扣，就算教練赫基再醒，都要花一段時間執過。不過肯定嘅係，門將比拿利奧因傷缺陣後令防線欠缺安全感，主場都冇把握保持不失。

史浩克近績佔優
史浩克04今季由踢法進取嘅比騰列達執教，將陣式由4231改為442，兩名新兵前鋒迪山度同中場罰球專家祖漢斯基斯迅即融入球隊，中場靈魂達斯拿傷愈後回復勇態，再配合創造性甚強嘅中場祖普莫亭同哥列斯卡，可以畀到箭頭亨特拉爾更強支援，史浩克近三次對禾堡取得兩勝一和佳績，係德甲列強中對禾堡近績最好一隊，有受讓之利相當吸引。

不過，史浩克本身攻強守弱，防線賀維迪斯、拿斯達錫同內田篤人都因傷缺陣，兩軍對賽經常大手交易，自2008年以來近15次交手，竟然有13場開出入球大，既然開大率咁驚人，不如簡簡單單捧大盤穩陣。