週日深夜，英超本轮又有两场激战同时开波，其中利物浦将会作客对阵卡迪夫城。众所周知，红军与曼城今季为咗联赛锦标斗到难分难解，嚟到最后时刻大家都唔可以错失每场胜利，尤其是前者，未算曼城本轮赛果，利物浦喺先赛一场情况下净係领先2分，夺冠主动权唔喺自己手上。所幸，球队未来嘅赛程相对轻鬆，面对每个对手都可谓食硬冇商量，就算卡迪夫城肩负保组任务，全方位处于下风嘅佢哋今铺预计拱手送上3分为红军上位让路。

唔经唔觉今季英超嚟到尾声，卡迪夫城旧年夏天从英冠翻嚟之后嘅路要点行基本如大家所料——长期为护级而战。虽然上轮作客凭藉文迪斯拉恩以及施恩摩里逊联手建功击败排名啱好高自己一位嘅白礼顿，不过宜家仲落后人哋2分兼且踢多一场，想爬出降班漩涡唯有每天努力多一些。要留意，卡迪夫城上轮保组大战赢波之前真係衰到贴地，二月下旬起连续7轮入边经历过2次三连败，期间四度「食白果」，疲软嘅进攻火力无疑係佢哋深陷困境最主要原因，赛季至今均场0.88个入波净係得副班长哈德斯菲尔德表现得更恶劣。今铺面对最佳状态嘅利物浦，卡迪夫城输面究竟有几大？不妨一览今季同「BIG6」嘅交战纪录，曼城、热刺、阿仙奴同车路士都已经对卡迪夫城完成双杀，另外首循环对阵曼联就输1比5，而对住利物浦就输1比4，即係10场全部输晒，名符其实嘅送分童子。考虑到利物浦为咗一嚐阔别卅几年嘅顶级联赛冠军滋味，呢3个积分对于红军嚟讲似乎仲紧要过卡迪夫城嘅保组任务，所以今轮对决胜负悬念的确唔大。阵容方面，后卫马菲干路尼、班巴、中场哥林柏达臣以及哈利艾达均因伤高挂免战牌。

嚟到四月下旬，利物浦仍然喺联赛同欧冠呢两条最具分量嘅战线上奋斗，全赖主帅克洛普令全队上下众志成城。上週中欧冠盃准决赛，红军带住首回合嘅2球优势去到巨龙球场再战波图，原本以为会畀翻小小面人哋，点知踢得仲加勇勐最尾赢4比1、两回合6比1轻鬆过关，可以睇得出克洛普真係做足两手准备，万一英超争唔赢曼城，喺欧冠呢度一定要弥补旧年嘅遗憾。好彩，欧战暂告一段落，嚟紧几个礼拜利物浦所有嘅心机肯定摆喺联赛度，阵容厚度相比起曼城略显劣势呢方面暂时唔洗担心太多。回顾近期联赛演出，红军喺今年第一场输畀曼城之后已经连续13轮不败，其中最近5轮攞足15分简直遇神杀神。值得一提嘅係，三叉戟近排状态相当稳定，佢哋近5轮英超总共贡献9粒「士哥」，预计今铺会重演首循环大炒卡迪夫城嘅场面。尤其要称讚沙迪奥文尼，呢位塞内加尔球星近期获得无数好评，向来出名阉尖嘅名宿加历查都将佢视为球队近30年嚟最劲嘅翼锋；贵为上个月英超最佳，沙迪奥文尼过去一週喺欧冠攞出咗最有说服力嘅演出，对阵波图嘅首粒入球令佢成为队史欧冠淘汰赛首位入球达到双位数嘅球员，同时呢个入球令佢欧冠淘汰赛入球效率超过C.朗拿度同美斯等现役或退役球星。考虑到首循环4比1赢卡迪夫城嗰时沙迪奥文尼上演过梅开二度，相信今次都唔会错过继续刷新个人单赛季入球纪录嘅好机会。