愛華頓難掠“水”

    英超明晨有獨腳戲，由愛華頓主場迎戰水晶宮。愛華頓近期表現都算四平八穩，連埋聯賽盃連續六場保持不敗，取得三勝三和，近兩個主場更取得連勝，球員整體狀態保持一定水準，今仗對住水晶宮確有一定勝算。不過，對手水晶宮狀況亦唔差，更有連場佳作，包括摸和曼聯及擊敗利物浦，上場更大炒紐卡素五個一皮，證明呢班波有一定作戰能力。初盤愛華頓要讓半球，“拖肥糖”要攞足三分並非容易，水晶宮“愛”得過。

    其實愛華頓近六場對手，除韋斯咸較為有些少實力外，幾支球隊都係榜尾位置，上仗聯賽更被尾三嘅般尼茅夫三比三逼和，防線多次嚴重犯錯，係球隊最大致命傷，今場對住靱力十足嘅水晶宮，實在難言穩勝。

    睇過直播水晶宮對曼聯一戰，呢班波的確唔簡單，組織能力相當強，多次攻勢力壓曼聯，“紅魔鬼”唔輸都算好彩；對利物浦踢穩守突擊同樣極具效率。陣中嘅卡比耶、麥亞杜亞及波拿斯爾甚具質素，絕不輸蝕畀愛華頓。

    推介：和波2:2