紅軍開大“素”

    英超已經踢過三分一賽程，如果包尾嘅維拉叫做已經去到無藥可救地步，咁尾二嘅紐卡素都可以話入得深切治療部，咁搞法遲早等死。今輪聯賽仲要對住如日方中嘅利物浦，“紐記”就算有主場之利，恐怕亦難逃一敗。

    利物浦呢期真係勁到爆，聯賽兩連勝，唔聲唔聲已上到第六位，開始重現爭標希望；上場聯賽盃更加大炒修咸頓六個一皮，昂首進入四強，領隊克洛普果然有料到。今晚作客紐卡素乘勝追擊，紅軍勢必再度展開大廝殺。初盤利物浦讓半球／一球，紅軍碌“卡”不成問題。

    攻不鋭守不穩，“紐記”在聯賽只攻入十四球，當中有七場比賽冇波入，防線脆弱不堪，近兩場共失八球，亦是英超球隊中失球最多一隊。目前更加屋漏兼逢連夜雨，傷兵一大堆，包括泰萊、迪奧迪、奧拔頓及正選門將添古爾等主力。殘陣迎戰利物浦，睇怕必敗無疑。

    克洛普接手紅軍後，領軍十一場取得七勝三和一負，唔到你唔服佢嘅領軍能力。強勢得咁交關，“紐記”未踢已經輸勢輸陣。

    推介：利物浦3:0