男夠“利”，女要“美”

    近期最受波迷關注嘅，係美洲國家盃及女足世界盃，兩項國際大賽如火如荼，打埋今晨比賽，四強亦隨之誕生。汰弱留強一向都係各項體育競技正常原則，但如有其他因素在內，大家亦無需太多思索，否則國際足聯都唔使咁麻煩。

    先講美洲盃，主辦國智利，“非常”黑馬秘魯，及頂頭大熱阿根廷經已佔咗四強三個席位，執筆之時，未知巴西還是巴拉圭可以搭到尾班車。但無論邊隊，個人感覺今屆美洲盃真係估佢唔到，除東道主智利最“循規蹈矩”外，其他三強似乎可信不可賴。畫公仔唔使畫出腸，千祈唔好畀我批中，今屆美洲盃冠軍係智利囉。

    女足世界盃較正路，巴西十六強止步與人無尤，只怪球隊表現未達到預期效果。中國姑娘始終難逃宿命，再一次敗在美國女足腳下，但“中女”每一場表現都經已令人拍掌，確令每一個中國人都應該感到自豪。事實上，美國女足整體發揮的確極具冠軍相，就算上屆冠軍“東瀛魔女”有機會再決戰美國，小弟都係鍾意“美女”。