美洲盃智阿鹿死誰手?

    美洲國家盃經已去到尾聲，智利將會與阿根廷展開終極一戰。憑住天時地利人和嘅主辦國智利終於不負衆望，成功殺入決賽，能否如願成為今屆王者，大家就要拭目以待。

    其實智利晉級過程可以話順風順水，分組賽三支對手基本上威脅唔大，出線意料之事。在淘汰賽階段，更加天助我也，對住戰力較強嘅烏拉圭，以及四強對秘魯，都係借助人多打人少擊退對手，實際上決賽之路並未受到太大考驗。

    當然，智利陣中確有唔少在歐洲搵食嘅高質素球員，始終都有一定戰鬥能力，但決賽對住世界盃亞軍嘅阿根廷，智利除要靠“地頭”之利外，亦要踢出爭勝決心才能排除萬難。

    阿根廷雖然係今屆捧盃大熱，可惜分組賽至八強，並未表現出極強霸氣，直至昨晨四強大炒巴拉圭，先至似返支世界級勁旅。如果以兩隊比較，阿根廷平均人腳、個人技術及整體實力無疑都在智利之上，可以稍為睇高一線。但波係圓，一日未“吹雞”完場，都未知鹿死誰手。