阿根廷“買”定離手

    阿根廷對完雙“圭”之後，明晨在美洲盃分組賽最後一場對牙買加，要首名出線避開強敵，必須要大殺對手。以該隊超強人腳，極具殺傷力嘅攻擊線，贏波應該不成問題，只看能否將對手殺個血流成河。

    兩戰兩敗嘅牙買加今場只屬例行賽事，勝負完全無關痛癢，只望繼續踢出前兩場拼勁，與阿根廷力戰到底。輸，都要輸得好好睇睇。只怕對住阿根廷呢支世界級勁旅，恐力不從心。初盤阿根廷硬讓兩球，照捧阿根廷贏波贏盤冇黐“牙”。

    阿根廷前兩場表現確未盡人意，可能南美波經常對陣都踢到飛沙劈石，埋身肉搏實牙實齒，幾位球星都要就住踢，今場對中北美洲球隊，美斯、阿古路及迪維斯等應可盡情發揮，係時候盡顯王者本色。

    牙買加陣中有唔少來自英倫奇兵，摩根與馬里亞柏效力英超球會，希陀、麥安拿夫、麥奇利、柯士甸及當堅斯等正選唔係踢英冠就係英甲，平均波底肯定不及阿根廷多名星級人馬，最後一戰期望將失球數字減到最低。

    推介：阿根廷4:0