捧哥倫比亞食“魯”

    美洲盃C組出線形勢七國咁亂，四隊明晨展開互劈。哥倫比亞先撼秘魯，贏波一隊率先殺入八強，激戰在所難免。

    哥倫比亞雖然首戰爆冷不敵委內瑞拉，但第二場對住巴西踢出無比爭勝決心，同時亦顯示出球隊確有強大實力去爭標。對住戰力稍遜嘅秘魯，只要繼續踢出對巴西一戰嘅鬥心及應有水準，食“魯”冇問題。秘魯上場人多蝦人少，仲要靠卅七歲老將比沙路建功，以一球險勝委內瑞拉，贏得相當艱難。近十次對住哥倫比亞不但未贏過，更連續兩場成為腳下敗將，今仗恐怕難以發圍。初盤哥倫比亞讓一球，必捧哥倫比亞贏波有“秘”訣。

    跟住巴西對委內瑞拉，巴西頭兩場表現都係差強人意，球隊實在太過依賴尼馬，今仗呢位食糊人物需要停賽，又睇吓“森巴兵團”真正威力有幾多。計名氣，委內瑞拉當然不及巴西威名遠播，不過近兩次對住巴西都可悶和對手，可以加強今仗鬥心。況且搏命一戰，定必力拼到底。初盤巴西讓一球／球半，可冷敲委內瑞拉。

    推介：哥倫比亞2:0秘魯

     巴西1:1委內瑞拉