熱刺“維”大數

    英超明晨上演獨腳戲，熱刺主場迎戰維拉。連續四場不勝後，熱刺上場終於大發神威，五比一大比數屠“夫”，乘勝追擊，今仗對住死氣沉沉嘅維拉，料可再次大開殺戒。

    踢咗十輪聯賽，包尾嘅維拉只得一勝一和八負，戰鬥力弱到不得了，成為各隊搶分目標，長此落去睇怕下季都要降落英冠。今場對住要爭上位嘅熱刺，維拉恐怕毫無還擊之力。初盤熱刺讓一球／球半，火力全面回升，熱刺今仗最少在白鹿徑擺三“維”。

    熱刺人腳班底雖然並非巨星級，但都係極具級數球員。中場艾歷臣與拉美拿絕對係好波之人，鋪橋搭路，創造力十足，簡直攻守兼備；射手“卡尼仔”上場連中三元，重現射手本色，勢必繼續爭取“士哥”；至於防線方面都唔需要太多憂慮，因為維拉係英超中攻擊力最差的一隊，熱刺可以放心狂攻。

    維拉聯賽六連敗，教頭舒活被迫“豉椒炒魷”，管理層及球隊內部問題多多，球員整體質素又欠缺平均。最慘已經輸到信心大失，戰意及鬥心相當低落，今仗祇能盡力而為，但求輸少當贏。

    推介 : 熱刺3:0