新特蘭“愛”作戰

愛華頓一向有強隊殺手之稱，不過今季似乎浪得虛名，之前對利物浦、曼聯及阿仙奴三場“紅”色戰役中，只能在利物浦身上攞得一分，上仗聯賽盃對住下游球隊諾域治亦只能逼和對手，最後靠互射十二碼驚險過關。正式嚟講已經連續四場未贏過，狀態認真麻麻，“拖肥糖”必需一場勝仗沖喜，今晚主場迎戰尾三嘅新特蘭，應該係時候反彈。

不過睇返近年對賽往績，愛華頓原來都幾驚“貓”，近五次對陣輸咗三場，只係贏過一場，包括上季主場落敗，即係話今晚再戰新特蘭，“拖肥糖”根本毫無必勝把握。初盤愛華頓硬讓一球，大圍實在太過高估“拖肥糖”，終於開齋取得首勝嘅新特蘭士氣大增，今仗最少攞一分唔難。

愛華頓今季攻守的確欠缺銳利，可能受到傷病影響，派拿亞、拜尼斯及希拔依然休戰，最慘係後防大將查積爾卡加入傷兵名單，令防線雪上加霜，慶幸今場對手新特蘭攻擊力有限。話雖如此，一“勝”解千仇嘅新特蘭為要脫離降班威脅，必會力拼到底，愛華頓肯定難踢。