国际大赛男够利女要美

近期最受波迷关注嘅，係美洲国家盃及女足世界盃，两项国际大赛如火如荼，打埋今晨比赛，四强亦随之诞生。汰弱留强一向都係各项体育竞技正常原则，但如有其他因素在内，大家亦无需太多思索，否则国际足联都唔使咁麻烦。

先讲美洲盃，主办国智利，“非常”黑马秘鲁，及顶头大热阿根廷经已佔咗四强三个席位，执笔之时，未知巴西还是巴拉圭可以搭到尾班车。但无论边队，个人感觉今届美洲盃真係估佢唔到，除东道主智利最“循规蹈矩”外，其他三强似乎可信不可赖。画公仔唔使画出肠，千祈唔好畀我批中，今届美洲盃冠军係智利囉。

女足世界盃较正路，巴西十六强止步与人无尤，只怪球队表现未达到预期效果。中国姑娘始终难逃宿命，再一次败在美国女足脚下，但“中女”每一场表现都经已令人拍掌，确令每一个中国人都应该感到自豪。事实上，美国女足整体发挥的确极具冠军相，就算上届冠军“东瀛魔女”有机会再决战美国，小弟都係锺意“美女”。