拜仁再擒“狼”

    明晨德國盃上演強者對陣，禾夫斯堡三戰拜仁慕尼黑。開季德國超級盃，“狼堡”在法定時間內逼和拜仁，最終更在互射十二碼殺敗對手捧盃。不過，上個月在聯賽第二次碰頭，被拜仁狂數五比一，雙方實力優劣立見，今次又再冤家路窄，在德國盃第二圈就火星撞地球，“狼堡”雖有主場之利，但要報慘敗之仇，恐怕難以如願，拜仁在德甲始終超晒班，“狼堡”根本未有足夠能力可以挑戰班霸。初盤拜仁慕尼黑讓一球，料拜仁繼續割“禾”。

    禾夫斯堡近三戰取得全勝，除歐冠盃擊敗實力較強嘅燕豪芬外，其餘兩仗一隊係排聯賽榜尾二嘅賀芬咸，及上仗險勝升班馬達斯泰特，實際上三隊威脅唔算太大，今戰對住拜仁隨時又見底。

    聯賽十戰全勝，攻入卅三球只失四球，拜仁的確未逢敵手，既然上次對戰五比一炒起“狼堡”，相信今次亦唔將對手放在眼內，一個“羅拔仔”已經搞到對手防線兵荒馬亂，仲有湯馬士梅拿，再加埋上仗復出就有“士哥”嘅洛賓，試問“狼堡”又點頂得住拜仁嘅火力？

    推介：拜仁慕尼黑3:1