鎚仔幫扑“車”

 車路士今季戰績大幅下跌，九戰過後僅得十一分排第十二位，要衛冕聯賽冠軍真係要加把勁，“老摩”必須要急謀對策，今晚場倫敦打吡將對住強隊剋星韋斯咸，車仔非小心翼翼不可，否則隨時成為“鎚”下亡魂。

 “鎚仔幫”今季一次又一次令波迷驚喜，先後殺敗阿仙奴、利物浦及曼城三支勁旅，目前更守住前四位置，上輪又大鬧水晶宮，球隊士氣高昂，今仗主場迎戰死晒火嘅車仔，“鎚仔幫”拆“車”有望。初盤車路士讓半球，目前嘅車仔根本冇人驚，韋斯咸坐和望贏。

 “鎚仔幫”今季人腳真係唔可以睇小，皮耶特、蘭仙尼、謝拉域及奧邦拿等猛將加盟，前中後三線實力大大提升，連後備力亦份量十足，更值一提係前線攻擊能力，九場聯賽攻入二十球，僅次於榜首曼城，呢支大踢進攻足球嘅爛打型球隊，難怪多支強隊都被扑死。

 連續三場不勝嘅車仔終於在上仗聯賽執返三分，主場擊敗尾二嘅維拉，惜周中歐冠盃只能摸和對手，整體發揮依然未回復強勢，暫時都係忍手吧。

 推介：韋斯咸二比一