紅軍一球難過“山”

英超上星期最熱話題，係利物浦新帥克洛普強勢登陸英超，惜首戰未能報捷，但作客摸和戰力頑強嘅熱刺，總算有個交代。始終初到貴境第一場揸“弗”，對球員特性、英超踢法、其他對手底蘊，甚至文化與各方面等都要時間適應，所以“紅粉”迷短時間內千祈唔好期望太高，畀啲時間克洛普帶領紅軍重振雄風。

明晨克洛普就要率領紅軍踢第一場歐戰，對手係俄羅斯球隊卡山魯賓，對克洛普嚟講需要爭取第一場勝仗。況且之前兩戰未曾一勝，紅軍要出線今仗主場非勝不可。

對熱刺一戰，克洛普令球隊最大改變係壓迫性踢法增強不少，唯一可惜係球隊目前傷兵太多，包括賓迪基、恩格斯、亨達臣及費明奴等多名中前場主力，令克洛普限米煮限飯，贏波本錢大減形勢下，紅軍今戰只能小勝格。

卡山魯賓平均實力明顯低於紅軍，陣中最有名氣只有巴西援將艾杜亞度、俄羅斯國腳古斯文及白俄國腳基斯耶克，基本對紅軍威脅不大。初盤利物浦硬讓一球，走盤機會相當高，不妨考慮波膽一比零。

推介：利物浦1:0