紅魔鬼作客“愛”唔過

英超今晚有兩場重頭戲，頭場有熱刺火併利物浦，接住愛華頓激戰曼聯。“雙紅”都係踢作客，老實講句，小弟真係唔睇好紅軍與紅魔鬼會有勝算。

尤其曼聯對住硬骨頭嘅愛華頓，皆因紅魔鬼近三次去到葛迪遜公園球場都係輸波收場，上季更慘吞三蛋。大部分主力又剛踢完國際賽，唔多唔少受到一定影響，曼聯要全取三分談何容易。初盤曼聯仲要讓平手／半球，捧硬愛華頓坐和望贏。

愛華頓今季踢咗八場聯賽，經已遇上多支強勁對手，除輸畀曼城外，曾經殺敗車路士，和過利物浦及熱刺，證明“拖肥糖”並非等閒之輩。特點更是遇強越強，證明戰意特别強橫，加上踢法硬朗兼體力十足，埋身緊迫及波到人到，紅魔鬼最驚就係呢種踢法。

曼聯上仗作客被阿仙奴打到落花流水，三球落敗亦反映出防線漏洞百出，四場作客共失七球，攻力點強都冇用，簡直得不償失。由於陣中大半隊主力都要為國捐軀，舟車勞頓剛歸隊，踢體力戰經已輸蝕畀愛華頓，和波搶一分算係功成身退。

推介：愛華頓1:0