荷蘭“薩”無赦

水深火熱嘅荷蘭要殺入明年歐國盃決賽周，已經無路可揀，最後兩場只有破釜沉舟，殺，殺，殺。今晚作客同組包尾嘅哈薩克斯坦非要殺個片甲不留不可。

哈薩克在A組中係最弱一隊，八戰只得兩和六負，足球水平與荷蘭相差兩三班，只望在主場踢爭氣波，輸少當贏。初盤荷蘭硬讓球半，背城借一嘅“橙衫軍”勢必反“克”成功，贏波贏盤唔難。

荷蘭暫時落後第三位嘅土耳其兩分，除要連贏兩場外，仲要望土耳其失分。命運掌握在他人手上，目前環境已別無他選，最緊要自己踢好最後兩場生死戰。其實荷蘭搞到如此地步，可以話咎由自取，上仗對土耳其關鍵之戰，就係求勝心切，結果三球大敗。經過慘痛教訓後，相信今場亦唔會輕視對手，首要目標先爭取第一個入球。雲佩斯狀態低沉，就要靠晒在曼聯有不俗表現嘅迪比。亨迪拉亞近期狀態亦唔錯，絕對有望反彈炒起對手。知恥近乎勇，預料哈薩克以守代攻，但八場分組賽失十六球，防守穩極有限，最低消費兩球冇走雞。

推介：荷蘭3:0