英格蘭“愛”到底

明晨歐國盃分組賽戲碼一般，皆因都係強弱對戰，西班牙主場對魚腩中之魚腩盧森堡，應該要幾多球有幾多球。鎖定出線嘅英格蘭將迎戰歐洲四五線球隊愛沙尼亞，贏唔到，唔該鶴臣即刻自動消失。

從英軍名單所見，朗尼、卡域克、占士米拿及禾確特經已“升呢”成為陣中四位大哥，搭住史達寧及巴克利等後起之秀，對住“二打六”球隊，肯定夠殺有餘。至於首次入選嘅利物浦前鋒恩格斯與熱刺中場阿里，有機會上陣的話，相信亦會盡力發揮博表現。對住魚腩一族嘅愛沙尼亞，只係睇英軍可以贏到幾多球。

領隊鶴臣曾經誇口講過，分組賽以全勝姿態出線，目前八戰八勝，攻入廿六球只失三球，當然威到盡。但講真一句，同組對手有邊隊話有真正威脅？阿Ben帶隊都得啦。唔係潑冷水，去到決賽周，睇下鶴臣又有幾多料？愛沙尼亞嘅足球水準在歐洲嚟講根本未入流，預咗只係“陪襯”角色，今場作客都係四個字：“輸少當贏”。初盤英格蘭讓兩球／兩球半，三球最少冇走雞。

推介：英格蘭4:0