德國讓一“愛”唔過

歐國盃外圍賽明晨又再開戰，打埋呢兩輪比賽，就可確定邊十九支球隊率先打入明年嘅法國決賽周。世界盃冠軍德國今輪作客愛爾蘭，預料將會受到對手頑強挑戰，因為D組形勢，愛爾蘭非博不可，和波都凍過水。

至於排榜首嘅德國，出線就定過抬炸彈，目前已手執十九分，最後一輪主場對格魯吉亞，德軍根本可以訂定機位去法國。所以講到作戰心態、拼搏程度，愛爾蘭定必去到盡。初盤德國要讓一球，論雙方實力比較、人腳級數及整體踢法，德國無疑在愛爾蘭之上。但臨場鬥心與戰意，就係爭勝動力，加上主場球迷呐喊助威，更會踢出加一波，受讓一球嘅愛爾蘭並非輸硬。

踢完德國，最後一場仲要作客對波蘭，愛爾蘭確要絕境求生。但英倫三島球隊，一向都有打不死精神，奮勇作戰到底，祇要有一線希望，都會戰到最後。唔好忘記，首循環德國主場，只係同愛爾蘭打成一比一平手，今場作客又何來穩勝把握，加上一衆效力大球會嘅球星，又會否拼命為國捐軀？

推介：和波1:1