愛華頓一路向“西”

    英超第七輪今晚壓軸一戰，由西布朗迎戰愛華頓，西布朗雖有主場之利，但今季各項賽事未贏過一場，有等於冇。愛華頓今季作客又未輸過，即係話，今場波根本冇分主客場着數。

    計雙方平均實力，“拖肥糖”無疑在主隊之上，近三戰取得兩勝一和，其中更殺敗上季冠軍車路士，比起上場慘吞諾域治三蛋嘅西布朗強勢得多，加上愛華頓上季作客兩球淨勝西布朗，“拖肥糖”各項數據佔優。初盤愛華頓只讓平手／半球，西布朗搵你“愛”。

    西布朗的確毫無主場優勢，上季聯賽輸多過贏，當然係與人腳實力有關。陣中雖有唔少名氣球員，安尼捷比、耶高普、費查及林拔等，但真正級數去到邊，大家心裡有數。防線除伊雲斯踢過曼聯大會外，其他只係“草根階層”，對諾域治都可以失三球，呢條防線點放心得落。

    “拖肥糖”在英超屬於一支硬淨派球隊，且粗中帶細，贏車路士一戰完全踢出球隊風格。球隊目前傷兵唔少，不過，巴克利與賴史密夫今期當起，足以打殘戰力一般嘅西布朗。

    推介：愛華頓2:0