皇蘇打“包”上

明晨西甲有場實力之戰，皇家蘇斯達激鬥畢爾包。兩隊都屬於西甲“中量級”球隊，實力可謂半斤八両，近三次對賽都係一比一平手不分勝負，今仗鹿死誰手確要打過先知。

皇蘇上場終於打開今季勝利之門，士氣急升。至於畢爾包連輸兩場不特止，開季四場各項賽事踢作客，輸三場和一場，其中兩場聯賽只入一球失五球，作客認真唔掂。初盤皇家蘇斯達小讓平手／半球，捧皇蘇乘勝追擊“包”冇甩拖。頭四戰未嘗一勝嘅皇蘇上仗終於大發神威，憑住阿基列斯連中三元，作客情況下三球大炒格蘭納達，贏得相當清脆俐落。今場返到自己地頭，相信會踢得更加流暢。除阿基列斯外，卡路士韋拿，莊拿達斯及般馬都有一定入球能力，對住防守力度有限嘅畢爾包，預料必有斬獲。

畢爾包除主場擊敗加泰外，四場聯賽全輸，目前只得三分。為免在榜尾位置掙扎，必須要全力搶分。球隊打穩守突擊還可以，但與同級波對攻，必令防線更加受壓，隨時自取滅亡，如無意外三連敗。

推介：皇家蘇斯達 二比〇