熱刺不敢怠“曼”

英超今晚早場又有激戰，熱刺主場迎戰曼城。連續兩季，熱刺無論主場抑或作客，始終都被曼城雙殺，唔通熱刺真係未夠班挑戰曼城？

足球比賽係逐場計數，最緊要講臨場發揮與球隊狀態，再加埋運氣及其他因素，又點會話熱刺輸硬冇得打？正如曼城主場都輸得畀韋斯咸啦。今季加強戰力嘅熱刺未打先判輸冇可能囉，至少近兩場聯賽回勇，連取六分可以加強比賽信心。初盤受讓半球，熱刺值博。

今季有亞洲新天王嘅孫弘民加盟，在歐霸盃與英超已攻入三球，其級數已證明三千萬歐元身價物有所值。韋列特與尼積爾亦具一定質素，仲有卡尼、拉美拿及傷癒復出嘅艾歷臣，熱刺今仗確有能力與曼城一較高下。

曼城連續在歐冠盃與英超兩場重要賽事落敗，再次出現表現欠穩情況，雖然周中聯賽盃大斬新特蘭止咳，但以最強人腳出戰，贏唔到就認真大件事。值得一提，曼城下周中又要出戰歐冠盃作客慕遜加柏，仲要醒醒定定冇得再輸，分心情況下，唔睇好曼城可以贏波。

推介：和波1:1