皇馬難打“包”

西甲明晨又有好波睇，開季在西班牙盃打到巴塞投晒降嘅畢爾包，係時候又在主場發揮威力，將挑戰另一豪門皇家馬德里，誓要斬“馬”成功再振聲威。

首戰作客弱旅希杭大意失分後，皇馬隨即大發神威，連續三場勁炒對手。不過，上場雖然取得四連勝，但只能一球小勝格蘭納達，呢三分都攞得相當驚險。今仗去到主場極惡嘅畢爾包，皇馬如未能發揮出水準，再度失分亦不足為奇。初盤皇馬硬讓一球，畢爾包可以值博。

畢爾包主場作戰的確爛打到痹，雖則冇星級球員壓陣，幾乎以“土炮”為主，但勝在夠落力，且埋身緊迫踢法極具效率，波到人到，皇馬要“上腳”真係唔容易。對住強隊，畢爾包嘅鬥心值得信賴。

皇馬目前有巴利與洛迪古斯有傷唔踢得，“正印”前鋒只有賓森馬與謝斯，鋒力無疑有所削弱。當然，C朗嘅殺傷力唔需多講，只係進攻點減少。更加唔可以睇小畢爾包嘅反擊能力，攻擊手阿度利斯埋門一腳把握唔差，巴塞都係死在佢腳下，近兩次作客只得一和一負嘅皇馬真係冇着數。

推介：畢爾包 二比一