波爾多爆“紅”

歐洲戰火繼續蔓延，明晨輪到歐霸盃分組賽展開，英超利物浦首戰作客法甲波爾多，連番受挫嘅紅軍剛踢完“雙紅”大戰，慘敗後又再出征，面對實力不俗嘅波爾多，未踢先輸氣勢，今仗取勝機會唔大。

波爾多屬於法甲實力派分子，球員基本質素唔差，且爛踢兼體力化，特點更是遇強愈精神，坐鎮主場出擊，話之你利“乜”浦，一於照攻可也。初盤平手，主場唔使讓波嘅波爾多至少坐和望贏。上場作客巴黎聖日門，在踢少一人情況下仍能逼和對手，顯示出永不言敗精神。陣中嘅沙維特、卡斯利及保恩積都係好波之人，新加盟嘅柏保路與加積斯實際又實用。波爾多名氣雖不及紅軍“響”，但勝在夠實力，今仗有望將對手殺退。

近三場聯賽和一場輸兩場，利物浦要爭英超似乎仲未夠班，歐霸盃可能係紅軍另一目標。但同組除波爾多外，仲有歐戰常客卡山魯賓與瑞士勁旅錫永，紅軍要出線受到極大考驗。今戰能否過到波爾多第一關，就要睇球員戰意如何？

推介：波爾多1:0