“三獅”獻“瑞”

歐國盃外圍賽共分九組，講到最巴閉就係E組嘅英格蘭，三獅兵團七戰七勝並攻入廿四球，歐洲列強中唯我獨尊；不過，阿Ben潑一潑冷水啦，只係同組對手實力問題啫，如果呢組都唔可以獨霸武林，英超直播費都冇可能收到咁貴，搞到本地球迷要紮英超癮。

講返正題，英格蘭明晨又再出戰，對手係同組中最強嘅瑞士，已穏入決賽周嘅英軍在自己地頭出擊，相信亦唔會放軟手腳，何況“英帥”鶴臣曾經講過，球隊要全勝姿態出線。至於朗尼經已平咗名宿查爾頓在國家隊四十九個入球紀錄，“肥仔”當然希望要威過前輩。而巴克利、卡尼、戴菲及史達寧等都要爭上位，預料將會全力撲擊瑞士。

上場反勝斯洛文尼亞後，瑞士亦已手握出線優勢，但唔怕一萬只怕萬一，必會盡力攞多一分得一分，絕對唔會束手就擒。由於今場作客，加上平均實力又不及英軍，瑞士首要目標先要保住大門不失，防守成為最大關鍵。初盤英格蘭讓半球／一球，既然三獅兵團咁有氣勢，一於照收利“士”。

推介：英格蘭1:0