荷蘭出“其”不勝

荷蘭在歐國盃外圍賽又輸一場，○比一不敵冰島後，真係破“冰”不成三大害：一，直接出線機會接近零；二，後防大將恩迪被罰紅牌要停賽；三，令荷蘭球迷痛心欲絕。唯一絲微出線希望，係要冰島與捷克餘下三場全輸外，仲要自己直殺到底，真係要聽天由命。

“橙衫軍”明晨將作客土耳其，哀兵出戰，簡直毫無激情可言，荷蘭應該走上絕路。土耳其機會更加微，只望在鄉親父老面前踢場爭氣波，趁對手病攞佢命，再送荷蘭一程。初盤荷蘭仲要讓平手半球，撐土耳其主場打“荷”包。

土耳其上場被拉脫維亞迫和後，可以修心養性踢埋幾場例行賽事，今仗主場出擊又冇壓力情況下，應該會踢得更放。人腳方面，杜蘭、高漢托尼、耶馬斯、杜普爾及卡漢路古等都係踢得之人，整體戰力與荷蘭唔會相差太遠。洛賓上場因傷退下火線，今仗應該唔踢得，恩迪又因紅牌要坐波監，荷蘭的確屋漏兼逢連夜雨，更嚴重嘅係士氣問題，希望“橙衫軍”能夠企返起身，不致於一敗再敗。

推介：和波1:1