史雲斯再驅“魔”

英超今晚又有好戲上演，上季雙殺曼聯嘅史雲斯，坐陣主場再戰曼聯。史雲斯的確有料到，計埋聯賽盃，開季四戰保持不敗，繼上季揭幕戰作客斬殺紅魔後，今季開鑼戰又有佳作，在史丹福橋球場幾乎擊敗上季冠軍車路士，證明呢隻“天鵝”唔易啃。

曼聯在歐冠盃果然氣勢十足，不過，三場英超只係兩勝一和，兩場贏波都贏得相當驚險，上場亦被紐卡素悶和，聯賽似乎仍未惡得出樣。初盤曼聯讓平手／半球，反映出“大圍”對紅魔信心有限，不妨再捧史雲斯再度斬妖除“魔”。

睇過史雲斯幾場比賽後，確要點名稱讚一對“黑鋒雙煞”高美斯與阿休，兩人包辦聯賽五個入球，係球隊最大殺傷力武器。另外，蒙迪路，施古臣及確克等都有水準發揮，只要繼續有出色表現，贏波根本不足為奇。

唔見咗對射門鞋嘅朗尼上場終於在歐冠盃爆發，上演帽子戲法協助球隊大勝對手，希望唔係迴光返照！由於布魯日首回合落後一比三，所以開波“焗博”，造成後防空虛，曼聯先至有機可乘。

史雲斯當然唔會與紅魔“立亂”駁火，始終都會退避紅魔三舍，進攻之餘亦會加強防守，曼聯未必有啖好食。雲戈爾接手紅魔後，兩度不敵史雲斯，話唔定今場踢作客，仲驚過對手。

推介：史雲斯2:1