聖徒作客難得“米”

歐霸盃附加賽第二回合明晨連場爆發，英超“死剩種”修咸頓將要作客丹麥球會米迪蘭特，贏波就可以進入分組賽，和波則要睇球數。首回合佔主場之利都未能擊倒對手，今仗作客恐怕難有勝算。

米迪蘭特係上季丹超聯賽“一哥”，今季由歐冠“降格”踢歐霸，論實力唔會差得去邊，千祈唔好當係三四流球隊。且近六場各項比賽三勝三和保持不敗，士氣與狀態值得支持。初盤作客嘅修咸頓仲要讓平手／半球，一於捧米迪蘭特等“修”錢。米迪蘭特陣中擁有多名國腳級球員，包括曾在蘇超及德甲搵食嘅拉斯慕臣，呢位一米八五北歐鋒霸制空力特強，係球隊最大殺傷力武器；仲有保爾臣、史斯東、首回合入波功臣嘅芬蘭國腳史柏夫及哥斯達黎加世界盃主力烏連拿等，有力與修咸頓一拼。

修咸頓今季有舒尼達連、奧斯華度及基連三大主力離隊，實力削弱唔少。雖然亦補入多名具質素球員，可惜季初表現一般，三場英超只得兩和一負，對住實力較強嘅愛華頓更慘呑三蛋，氣勢盡失。今場實在難以睇好。

推介：米迪蘭特1:0