曼城嗒“糖”

上季英超亞軍曼城開季兩戰兩勝，更以得失球優勢暫列榜首，最激勵士氣係上仗三球大勝死敵“車仔”，今晚作客另一支“藍軍”愛華頓，曼城誓必借勢行兇，聯賽三連勝志在必得。

愛華頓上仗終於踢場爭氣波，作客情況下同樣以三球大勝同級對手修咸頓，顯示出球隊並非三四流之輩。只不過整體表現時好時壞，發揮實在太過飄忽，正如首戰主場對升班馬屈福特一樣，上下半場完全兩班波。今場對住氣勢十足嘅曼城，愛華頓隨時貪勝不知輸。

初盤曼城讓半球／一球，既然“大圍”讓得呢個盤，好明顯對作客嘅曼城充滿信心，不妨捧曼城再下一城。兩場聯賽共入六球兼零失球，無論進攻與防守，曼城都令人信服，特別對“車仔”一戰，若非對方“車門”貝高域表現出色，曼城又點止贏三球。Y杜尼、D施華及阿古路開始“起Q”，對住防線替補力不足嘅愛華頓，曼城要入波話咁易。

愛華頓左右閘拜尼斯與靴拔兩大主力有傷唔踢得，中堅史東斯表態要離隊，防線已出現極大危機，要頂住曼城強大火力，睇怕力不從心。

推介：曼城2:1