曼聯炒“紐”格

英超聯賽進入第三輪比賽，紅魔曼聯頭兩場分別險勝熱刺與維拉，呢六分都攞得相當驚險。不過，周中嘅歐冠盃附加賽就踼得特別精神，以三比一大勝比利時冠軍布魯日，一班“魔星”明顯開始上力。今晚坐鎮奧脫福迎戰紐卡素，紅魔有望取得開季四連勝。

紐卡素上季僥倖護級成功，今季避免再食驚風散，所以人腳上有所變動，包括新任主帥麥卡倫，及引入多名較具質素球員。惜開季發揮並未達到預期效果，整體之間配合仍需時間磨合，以頭兩場表現所見，實在難以向紅魔挑戰。初盤曼聯硬讓球半，主場出擊勝算十足，一於捧紅魔開大“素”。

曼聯對住熱刺與維拉兩場比賽中，中目標射門加埋只得三次，但周中大勝布魯日一戰，進攻力度的確加強，十九次攻門八中目標，荷蘭小將迪比更加踢出身價。只要朗尼今仗能夠重拾射門鞋，要炒起“紐記”應該“依絲執”。上季除降班嘅昆士柏流浪外，紐卡素作客成績與失球數字都係排第二差，今季兩場聯賽已失四球，呢條超弱防線唔大敗都難。

推介：曼聯3:0