比錫達斯踢好“波”

【本報消息】歐冠G組榜首的比錫達斯，今晚主場硬撼波爾圖力爭首名出線。兩隊人腳接近，波爾圖近況強勢，但比錫達斯今仗有地利，一分已足夠保首名出線，比錫達斯有望順利達標。

比錫達斯近況不過不失，近六場不敗，但勝和各三的表現未見突出，目前在G組領先波爾圖四分排榜首，今仗和波亦足以鎖定首名出線。比錫達斯有杜辛、尼格度、巴布及泰利斯卡等鋒將近況不俗，不過波爾圖亦有射手阿布巴卡、D彭利拿及巴謙美大勇，三人近四仗合力炮製八個入球，助球隊搶得四連勝。波爾圖強勢作客，但比錫達斯主場四連和，雖要贏波不踢，但仍有望藉地利搶一分鎖定首名出線。

波爾圖射手巴謙美信心十足爭三分：“剛過去的盃賽，球隊贏得相當驚險，不過最重要以贏波迎戰歐冠大戰，今仗非常重要，可說是目前最大的目標，我們為今仗已準備就緒，且充滿信心。”

摩納哥誓劈“錫”
上屆四強分子摩納哥今季表現大失色，在小組未贏過僅兩分墊底，要保住出線希望，今仗主場撼多兩分的萊比錫非勝不可，亦要寄望比錫達斯贏波幫一把，至少亦要搶第三踢歐霸。幸摩納哥近況稍佔優，儘管法卡奧狀態一般，但整體人腳有優勢，加上萊比錫作客三戰不勝表現麻麻，主場的摩納哥仍有望睇高半線，力爭開齋。