皇馬打鑊“傑”

【本報消息】西甲衛冕冠軍皇家馬德里作客傑羅納，人腳實力皇馬贏幾條街，加上今季作客表現突出，縱使政治因素為今仗賽事添上陰霾，但實力狀態高幾班，銀河艦隊仍可望順利搶走三分。

加泰地區政局不穩，首都馬德里球隊皇馬作客加泰球隊傑羅納，雖然賽事如期舉行，但為安全起見，皇馬全隊將改為在當地租用大巴前往球場，而非一貫做法乘坐官方巴士。
牌面火力夠晒猛

論人腳牌面，皇馬肯定高幾班，雖然拿華斯、巴利、卡華積及高華錫等四名傷兵續缺陣，但銀河艦隊近七戰贏六場狀態十足，攻入十五球失四球，表現攻守兼備。C朗拿度領軍，阿辛些奧、伊斯高、賓森馬攻堅，皇馬前線牌面火力夠勁，防線由隊長拉莫斯、華拉尼、馬些路等領軍夠晒穩健，銀河艦隊今季七場作客全勝，作客頹勢的傑羅納有望睇好再搶得三分。

施丹唔擔心局勢
周中西班牙盃贏得驚險，但“艦長”施丹對作客傑羅納唔擔心：“周中西班盃得着不少，對手表現很硬淨，證明他們準備做得很好，不過贏得辛苦，亦令狀態進一步提升。我們不會抱怨賽程，聯賽、歐冠、盃賽，一早已經安排好，所有賽事同樣重要，我們亦必須為此準備好。加泰地區局勢？我沒有為此擔心，我相信已經做好一切安保的準備，我們只要專心比賽就可以。”

大戰前夕，中場卻奧斯豪言要爭奪四冠王：“沒有球隊能夠輕易對付，我們都明白贏冠軍會一年比一年難，但如果我們能保持表現，我有信心我們能夠再捧走四項冠軍錦標，我們有能力、亦有決心。皇馬是支偉大的球隊，我們對爭冠充滿信心。”

傑羅納難逃厄運
升班馬傑羅納西甲表現一般，開季至今九戰得九分排十五，周中盃賽主場再輸一仗，主場已連輸四場，狀態士氣同樣差勁；人腳實力又明顯差一截，射手史杜安尼七戰入四球表現合格，惜面對皇馬強大的後防，不足以單天保至尊，加上艾卡拿、艾羅爾中場兩大主力因傷缺陣，今仗主場想保一分亦難。