皇馬“蘇”哥利

【本報消息】西甲皇家馬德里繼續衛冕之路，作客硬撼皇家蘇斯達，皇馬周中歐冠大勝重振士氣，但今仗C朗拿度仍然停賽，遇上開季表現神勇的皇蘇，銀河艦隊今仗三分唔易搶。
皇馬聯賽開季表現麻麻，僅一勝兩和排第八，今仗作客鬥皇蘇為搶分非勝不可。皇馬今仗有C朗、馬些路齊“坐波監”，但防線仍有門神拿華斯復出擔正，配合拉莫斯、華拉尼扼守中路，皇馬防守仍有保證。惟火力有隱憂，儘管賓森馬可望趕及傷癒復出，賽前伊斯高續約同樣振士氣，前線連同巴利、阿辛斯奧攻堅，皇馬牌面仍有十足信心，惜巴利、賓森馬兩人近期腳頭失靈，無疑為今仗添隱憂，加上皇蘇四連勝氣勢十足，皇馬今仗想贏唔容易。

巴利要隊友冷靜
巴利提醒球隊冷靜迎戰：“球隊開季表現唔差，至少聯賽保持不敗，歐冠同樣以勝利開始，不過如果想贏取所有冠軍，這種表現仍未足夠。聯賽連和兩場或者會令人有點失望，但我們不能因此受影響，接下來的比賽必須更加冷靜應對，皇馬是一支強隊，能夠有能力跨越難關，爭取每一項冠軍。”

皇蘇開季三戰全勝，僅得失球不及巴塞排次席，盡顯黑馬本色。論人腳牌面，皇蘇肯定輸蝕，不過連周中歐霸再贏，搶得四連勝大振士氣，四戰失四球表現未算突出，但門將路爾尼領軍的防線，整體實力唔差。相比防守，皇蘇火力更為突出，射手祖安美聯賽三戰均有士哥腳風甚順；加上死球攻勢出色，帶刀侍衛D羅蘭迪開季已貢獻三球，皇蘇今仗主場地利，即使面對皇馬亦有本錢搶一分。

蘇魯杜薩信心足
皇蘇中場蘇魯杜薩豪言全取三分：“周中歐霸贏波，球隊表現相當出色，大勝一場無疑增添球隊對今場硬撼皇馬的信心。皇馬是非常出色的球隊，雖然之前連續兩場和波，但他們始終是冠軍、上游球隊，今場毫無疑問是硬仗。不過我們目標明確，就是贏波全取三分，過去球隊亦曾贏過皇馬，我們對今仗很有信心。”