葡萄牙勢“匈”夾狼

【本報消息】歐國盃冠軍葡萄牙目前在世界盃外圍賽歐洲區B組仍居次席，今晚作客鬥匈牙利實力贏幾條街，C朗又狀態大勇，三分有望到手續向榜首的瑞士施壓。

葡萄牙上仗主場大炒法羅群島搶得六連勝，士氣大振，但目前仍三分落後榜首的瑞士，爭首名出線仍一分不能少。人腳全面佔優，C朗上仗獨領風騷省三粒，狀態火熱，配合中前場兩大新星A施華及B施華，連同馬里奧及摩天奴攻堅，葡軍火力夠猛；後防有柏比及門將雷柏迪斯奧坐鎭，面對攻力麻麻的匈牙利，有足夠信心贏波。

葡軍主帥山度士對今仗信心十足：“我們仍有四場決賽要踢，為決賽周資格，每場都同樣重要。雖然我們落後瑞士排次席，但現時並不是考慮這事的時候。今仗作客匈牙利要取勝不容易，必須集中精神。我對球隊很有信心。”

瑞士脫穎而出
榜首的瑞士作客包尾的拉脫維亞，瑞士人腳明顯佔優，前線施費洛域上場梅開二度腳風頗順，連同美密迪及沙基利攻堅，攻力亦有保證，防線有多蒙特門神貝基把關夠穩陣，為保榜首優勢非勝不可。面對國際賽連輸八場、出線無望的拉脫維亞，作客亦有力全取三分。
法羅群島主場迎戰安道爾，兩隊同樣出線無望兼近況麻麻，前者近五戰主場不勝兼輸四場，縱有地利仍難言一勝，大有機會兩和俱傷。