馬賽“薩”氣騰騰

歐霸盃第四圈外圍賽，馬賽作客斯洛文尼亞當姆薩尼，無論人腳實力、名氣，馬賽明顯高幾班。雖然當姆薩尼主場表現突出，但馬賽同樣近況大勇，首回合作客至少可望保住不敗全身而退。

馬賽近況大勇，連同熱身賽在內，已錄得廿一戰不敗；上輪外圍賽輕鬆晉級外，法甲開鑼同樣兩戰全勝，攻入四球兼不失一球，攻守同樣交足功課，前線謝美恩、奧甘普斯狀態不俗，皮耶特、泰奧雲從後支援夠晒火力；防線有文當達把關同樣有信心，雖然當姆薩尼主場近六場不敗，馬賽狀態、士氣十足，首回合有力坐和望贏。

儘管贏面十足，馬賽教練加西亞未敢輕易言勝：“當姆薩尼名氣唔算大，但不代表他們沒有實力，反而我認為他們一直被看輕。當姆薩尼就像斯洛文尼亞的李斯特城一樣，隨時會為球迷帶來驚喜，我們必須小心謹慎應付今場賽事。”

畢爾包作客小心

畢爾包作客硬撼希臘彭拿典奈高斯，畢爾包人腳稍佔優。前線阿度利斯傷癒復出，領軍新星I威廉斯攻堅，配合魯爾加西亞中場支援，畢爾包火力有睇頭，不過近五戰三勝一和一負的近況未算突出。主場的彭拿典奈高斯近九場不敗兼搶得五連勝，畢爾包今仗作客要贏唔容易。