巴塞讓多唔敢“包”

啱啱捧完歐洲超霸盃嘅巴塞羅那又再馬不停蹄，明晨將與畢爾包爭開季第二項錦標的西班牙超級盃，首回合巴塞先作客。

巴塞係西甲班霸，畢爾包只屬於“中游派”，兩隊實力明顯有差距。不過畢爾包有主場之利，近五次主場對住巴塞取得一勝三和一負，巴塞實際冇太大優勢。且剛激戰完一百二十分鐘，隨即從格魯吉亞飛返西班牙，巴塞呢班“鐵打”球員能否發揮出較佳狀態確成問題。初盤巴塞羅那讓一球／球半，巴塞要贏波贏盤真係冇人夠膽“包”。

巴塞幾經艱苦才能殺敗西維爾，防線確實暴露出唔少弱點。最主要係個別位置替補力不足，特別左邊中後場，成為防守最大盲點。若非火力夠猛，巴塞可能已經輸波。

畢爾包以全“土炮”為班底，與巴塞班球星身價相比，真係小巫見大巫。球隊踢嘅係拼勁與鬥志，叫做正牌“爛仔波”，在自己主場料必踢出“地頭龍”本色，再針對巴塞防守漏洞，並非絕無爆冷機會。巴塞踢作客要贏兩球先至可殺盤，又談何容易？捧畢爾包至少可執半個盤。

推介：和波 一比一