皇馬唔“體”好

    西甲今晚有重量級大戰，皇家馬德里與馬德里體育會上演打吡。皇馬目前少踢一場只多死對頭巴塞兩分，重奪聯賽冠軍依然受威脅，今仗對住同市死敵要斬草除根，只要贏波就可以少個香爐少隻鬼。

    馬體會當然並非弱旅，雖則爭標機會渺茫，但施蒙尼絕對不會放棄任何希望，且亦要力保前三。皇馬在首循環曾三球大勝馬體會，今仗主場應可睇高一線。但之前交手只係勢均力敵，加上馬體會防守穩健，相信結果上落唔大。初盤皇馬讓半球／一球，博馬體會“守”字訣成功。

    皇馬上仗大勝雷加利斯，“丹爺”收起BBC，明顯留力兩場硬仗。下周歐冠作客拜仁係重中之重，亦成為今仗取勝的最大阻力。馬體會除防守出色外，球風硬朗，對住死敵皇馬肯定加多兩錢肉緊，施蒙尼會以一分為基本目標，穩守突擊求一分唔難。

    推介：和波1:1