國米爭四要“森多”

    今晚意甲有國際米蘭對森多利亞。排第五的國米唔好話要爭聯賽冠軍，要爭前三名踢歐冠都有困難，不過只要有一線希望，相信仍會爭取到底，至少亦要保住踢歐戰資格。國米近三場兩勝一和，狀態不俗，最得人驚係中前場入球能力，三戰共入十四球，其中賓尼加與伊卡迪一對阿根廷雙星表現最突出，比列錫及新晉意大利國腳加利亞甸尼同樣發揮出色，成國米搶分人物，只要保持勇態，要全取三分唔難。

    森多利亞亦非善男信女，近八場只輸過畀榜首祖雲達斯，當中取得五勝，包括擊敗第二的羅馬，但作客稍嫌信心不足，十四場作客輸足一半只有三勝，主要踢得較保守，前線火力有限僅入十三球，且球隊已無憂無求，爭勝決心成疑。初盤國際米蘭讓球半，不妨捧國米獲“利”。

    推介：國際米蘭2：0