巴塞“愛”不釋手

    西甲巴塞今晚坐鎮魯營球場，硬撼愛斯賓奴上演加泰羅尼亞打吡。論近況雙方不相伯仲，但論人腳地上最強贏幾條街，加上蘇神賽前續約，球隊士氣大增，魯營主場出擊三分可望到手。

    巴塞現時被死敵皇馬甩開六分，為進一步追貼力爭衛冕，今仗打吡唔輸得。論人腳有MSN在陣的地上最強肯定至少高幾班，周中友賽三叉戟齊齊有波入，兩名後備兵艾卡沙、拉芬拿同樣有士哥，巴塞火力強勁亦狀態十足。防線有烏迪迪復出後，同樣能夠“夫添”上陣，配合比基、史迪根防線同樣有保證，魯營主場八戰不敗，巴塞強攻愛斯賓奴贏面十足。

    愛奴態弗交功課

    作客的愛斯賓奴近況唔差，近五場取得三勝兩和交足功課，前線皮亞迪、謝拉特摩蘭奴表現不俗，兩人近幾戰輪住入波，腳風頗順。防線亦交足功課，在門神盧比斯帶領下，近五戰僅失過一球，有十足保證。惜今仗要作客魯營，儘管愛斯賓奴每逢打吡戰特別醒神，但面對巴塞攻守均有距離，今仗搶得一分已有交代。

    中場祖拉度有信心：“今場是打吡戰，無論是我們、抑或是巴塞，都同樣渴望全取三分，因此勝負對我們非常重要。我們知道要在魯營贏波非常困難，但我們亦曾作客馬體會逼和對手，今仗繼續搶分有何難。我們已準備就緒。”