皇馬捉鹿脫角

    世界冠軍球會盃終極決賽，西甲皇家馬德里撼日職鹿島鹿角，雖然東道主鹿島近況唔差，但皇馬明顯更勝幾籌，加上人腳實力高幾班，銀河艦隊贏面十足，第二座世冠盃手執半隻盃耳。

    皇馬近況表現超強，除打破隊史最長不敗紀錄，歐冠順利出線，聯賽更甩開死敵巴塞羅那六分，今仗世冠盃決賽無後顧之憂。皇馬近五戰三勝兩和狀態大勇，雖然面對巴塞、多蒙特等強敵和波而回，但迎戰低一班的球隊均凱旋而歸。講人腳皇馬亦肯定佔優，巴利重傷長唞BBC三缺一，但四奪金球獎的球王C朗、配合賓森馬、摩拉達攻堅，足以撕破任何防線。後防雖有隊長拉莫斯因傷避戰，但柏比領軍防線仍有保證，攻守同樣世界級，今仗可望再次加冕成世界冠軍。

    對冠軍充滿渴求

    洛迪古斯冀助皇馬再贏世冠：“對於我來說，當然希望決賽能夠對陣哥倫比亞的國民隊，我對於他們四強出局感驚訝，不過這就是足球一部分。今場決賽，每個皇馬的球員都清楚了解，這裡是對冠軍充滿渴求的球隊，因此我希望能為皇馬贏更多冠軍。我現時狀態不錯，亦充滿信心。”

    東道主鹿島鹿角近況不俗，五戰四勝一負，僅在日職輸過一場。今屆世冠盃接連報捷，先後踢走奧克蘭、辛當斯及國民隊等幾支洲際冠軍球隊，寫下日本球隊賽事最佳紀錄，現時狀態、士氣同樣高昂。惜論人腳鹿島無疑輸蝕，儘管陣中鈴木優磨、金崎夢生等表現不俗，但整體實力與皇馬有距離，鹿島今仗要再進一步締造歷史困難十足。

    植田要挑戰C朗

    後衛植田直通豪言要挑戰C朗：“我就好比一隻鱷魚，是一隻會將獵物拖入水中致死的動物，毫無疑問我們今仗要贏。我有信心無論高空攻勢、抑或地波傳送，都不會讓皇馬取得入球。我期望能夠在C朗面前再次展示我的實力。”

    季軍一戰，阿美利加會硬撼國民隊，實力雙方不相伯仲，但阿美利加經驗十足，近五戰三勝一和一負表現佔優，乘國民隊遭鹿島大炒頹勢，阿美利加有望睇高一線搶得季軍。