車仔“布”陣鞏榜首

    英超榜首的車路士在聯賽八連勝，狀態及士氣高昂，今晚主場迎戰西布朗，人腳及實力至少贏幾條街，有望乘勝追擊，鞏固榜首優勢。

    車路士自轉踢三中堅陣式鞏固防守後接連報捷，聯賽八連勝穩坐榜首，主帥干地、迪亞高哥斯達、柏度連奪英超十一月最佳領隊、最佳球員及最佳入球，完成“大滿貫”威到盡，全隊士氣高昂。車仔近五戰入十三球僅失兩球，表現亦冠絕英超，當中哥斯達、柏度及夏薩特的三叉戟狀態大勇，火力十足且防守滴水不漏，車仔在主場出擊，贏波應冇走雞。

    車仔上仗破曼城在積分榜領放，主帥干地拒認是冠軍大熱：“現在只踢了十四場，很難說我們一定是冠軍。踢得不好冇人睇好，但當踢得好自然又會有人談論爭冠。現在最重要是眼前對西布朗的比賽，聖誕快車的賽程不易應付，或者我們需要輪換，希望球員能保持狀態，集中精神去迎接比賽。”

    西布朗今季表現唔差，近五仗三勝一和一負排第七，表現遠超預期。不過人腳始終與車路士差一截，朗頓、菲臘斯及查迪利的整體表現一般，加上近五場作客僅一勝表現麻麻，遇上對三分志在必得的車路士，西布朗搶得一分已有交代。

    愛華頓慘被屈

    此外，愛華頓繼續沉淪，作客屈福特由盧卡古先開紀錄，惜卅六分鐘被奧卡卡妙射扳平，“大黃蜂”乘勝追擊，普特爾在下半場與奧卡卡五分鐘內各入一球，領先至三比一，盧卡古完場前梅開二度，仍無法阻止愛華頓輸二比三。

    愛華頓五場不勝兼作客四連敗，被屈福特爬過升上第七，拖肥跌落第九。