車仔讓波諗過“仙”

新一季英超要到下星期六才開鑼，但今晚率先上演社區盾，由兩支倫敦死敵球會阿仙奴與車路士爭奪首項錦標。

阿仙奴最近一次擊倒車仔要數返到一一年球季，跟住八次撞“車”都係傷亡慘重，只得三和五負未贏過。不過，兵工廠季前四場熱身賽表現“標青”，全勝兼攻入十四球只失一球，進攻與防守都發揮得淋漓盡致。特別在酋長盃賽事，多名主力包括華確特、奧斯爾、卡索拉、藍斯及山齊士等都顯示出極佳狀態。今場對住同市冤家，加上雲格十三次對住老摩未贏過一場，賽前記者會被老摩“寸”到飛起，兵工廠勢必大打爭氣波。

車仔今夏飛到亞洲及美洲開操，戰績屬於一般，只能一球僅勝泰國明星隊與悉尼FC，在國際冠軍盃亦只得兩和一負，整體發揮並非理想。另外，剛從美國回程，休息時間稍為不足，體能受到一定影響，以逸待勞嘅阿仙奴必會以針對性踢法，以快打慢向車仔施壓。初盤車路士讓平手／半球，受讓嘅阿仙奴今次反“車”有望。

推介：和波1:1